កោះកុង៖ ​នាព្រឹកថ្ងៃព្រហស្បតិ៍ ​៧រោច ​ខែពិសាខ ​ឆ្នំាថោះ​ ​បញ្ចស័ក ​ព.ស.២៥៦៧ ​ត្រូវនឹងថ្ងៃទី១១ ​ខែឧសភា ​ឆ្នំា២០២៣ ​នៅសាលាខេត្តកោះកុង ​អគ្គលេខាធិការដ្ឋានគណៈកម្មាធិការដឹកនំាការងារកែទម្រង់ការគ្រប់គ្រងហិរញ្ញវត្ថុសាធារណៈ ​(អ.គ.ហ) ​ដឹកនំាដោយឯកឧត្តម ​យ៉េត វិណែល ​អនុរដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ ​(កសហវ) ​និងជាអគ្គលេខាធិការរង ​អ.គ.ហ ​អមដោយឯកឧត្តម ​អ៊ុំ ​យុទ្ធី ​ប្រធានផ្នែករដ្ឋបាល ​ហិរញ្ញវត្ថុ ​ ​ត្រួតពិនិត្យ ​និងវាយតម្លៃ ​មន្រ្តីជាន់ខ្ពស់ ​មន្រ្តីជំនាញ ​នៃអ.គ.ហ ​បានសហការជាមួយរដ្ឋបាលខេត្តកោះកុង និង ​លោក ​កែវ ​សុខា ​ប្រធានមន្ទីរសេដ្ឋកិច្ចនិងហិរញ្ញវត្ថុខេត្ត ​បានរៀបចំទស្សនកិច្ចសិក្សាស្តីពីការគ្រប់គ្រងហិរញ្ញវត្ថុសាធារណៈ ​និងការអភិវឌ្ឍសេដ្ឋកិច្ចមូលដ្ឋានក្នុងខេត្តកោះកុង ​ដោយមានការចូលរួមដឹកនំាដោយឯកឧត្តម ​សំឃិត ​វៀន ​អភិបាលរងខេត្តកោះកុង។ ​

ឆ្លៀតក្នុងឱកាសនេះក្រុមការងារក៍បានពិភាក្សាអំពីរបាយការណ៍វិភាគ ​ភាពខ្លំាង ​ភាពខ្សោយ ​កាលានុវត្តភាព ​និងការគំរាមកំហែង ​(SWOT) ​នៃខេត្តកោះកុង ​ដែលរៀបចំដោយមន្ទីរសេដ្ឋកិច្ចនិងហិរញ្ញវត្ថុ ​ក្រោមកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ

ដំណើរទស្សកិច្ចសិក្សានេះមានការចូលរួមពី ​ឯកឧត្តម ​លោកជំទាវ ​អភិបាលរង ​តំណាងអភិបាល ​នៃគណៈអភិបាលខេត្ត ​លោក ​លោកស្រី ​តំណាងមន្ទីរសេដ្ឋកិច្ចនិងហិរញ្ញវត្ថុទំាង២៥ ​រាជធានី ​ខេត្ត ​និងមន្រ្តីពាក់ព័ន្ធ ​នៃរដ្ឋបាលខេត្តកោះកុង។